LITMIR.BIZ

Скачать книгу

ons u wil kan doen en in die blydskap daarvan kan leef.27

      Ons het deur die bloed van die Seun vrye toegang tot die heiligdom,

pelgrims op die nuwe weg wat na die lewe lei.28

      Weer daal die nag om aardse dag van aardse dag te skei

      en ons is in die wydte en ruimte, in die hoogte en diepte

      van ’n liefde wat ons verstand te bowe gaan.29

      3. Vader, ek ken die sinlose bestaan van haat en verset.

      Voorheen was ook ek onverstandig, ongehoorsaam, dwalend,

      vasgevang in die begeertes van die vlees.

      Ek was daar: In my haatlikheid het ek gehaat.

      Kwaadwilligheid en jaloesie was my bestaan.

      Sela. Word stil, my siel, en onthou waarvandaan jy uitgeval het.

      4–6. Ek het u genade in my onverdienstelikheid ontvang,

slegs op grond van wat U U voorgeneem het om te doen.30

      Die profesie van Abraham is ook vir my vervul:

“God sal sy eie offerlam voorsien.”31

      Sela. Word stil, my siel, en onthou waarvandaan jy uitgeval het.

      En nou sal hierdie nag lig wees soos dag.

      Niemand wat in Jesus Christus glo,

word ooit teleurgestel nie.32

      God van ontferming, maak my ’n getuie daarvan.

      7. Daar is niks om voor te leef nie, sê tienduisende:

      geen vreugde, hoop of toekoms nie.

      8. My God, in die diep donker van die nag fluister ek u Woord:

      Wat die oog nie gesien, die oor nie gehoor

      en in die hart van ’n mens nie opgekom het nie,

gee U vir dié wat U liefhet.33

      9. Ek gaan die rus van die liggaam in,

      vreesloos in die dieper rus van u guns.

      En voordat ek alles hier nogmaals kortstondig agterlaat

      asof in ’n skadutog van my siel se hemelvaart,

      besing ek die lof van U in Wie ek leef:

      “Heilig, heilig, heilig is die Here God,

      “die Almagtige,

“Hy wat was en wat is en wat kom.”34

      Besprekingsvrae

      1. Wat het jy gehoop om in dié psalm te kry?

      2. Wat het jy verwag om in dié psalm te vind?

      3. Hoe is die Ou-Testamentiese mens volgens dié psalm? Waarom sê jy so? Is ons nog so?

      4. Wat (kan) verander wanneer ons in Christus is? Hoe en hoekom sê jy so?

      5. Wat het God nou vir jou deur sy Woord aangaande Homself openbaar?

      6. Wat wil jy vir die Here sê?

25. Kolossense 1:24–27

26. Romeine 8:15

27. Galasiërs 1:3–5

28. Hebreërs 10:19–20

29. Efesiërs 3:18–19

30. Titus 3:4–5

31. Genesis 22:6–14

32. Romeine 10:11

33. 1 Korintiërs 2:9

34. Openbaring 4:8

      Psalm 5

      Dawid roep God teen dagbreek aan en verewig sy ervaring in ’n lied wat deur die Levitiese koorsangers gesing word.

      Psalm 5: Gebed by die môre-offer

      1. VIR die musiekleier; met fluite. ’n Psalm van Dawid.

      Dawid vra dat God hom goedgesind sal wees

      2. O HERE, luister na my woorde, let op my versugting.

      3. Gee ag op die stem van my hulpgeroep, my Koning en my God, want tot U bid ek.

      4. In die môre, HERE, sal U my stem hoor; in die môre sal ek dit aan U voorlê en afwag.

      Hoe God is

      5. Want U is nie ’n God wat behae het in goddeloosheid nie; die kwaaddoener sal by U nie vertoef nie.

      6. Die onsinniges sal voor u oë nie standhou nie; U haat al die werkers van ongeregtigheid.

      7. U sal die leuensprekers laat omkom; van die man van bloed en bedrog het die HERE ’n afsku.

      Wat God doen vir dié wat aan Hom behoort

      8. Maar ek, deur die grootheid van u goedertierenheid mag ek in u huis ingaan, my buig na u heilige tempel, in u vrees.

      9. HERE, lei my in u geregtigheid om my vyande ontwil; maak u weg voor my reg.

      Die stryd van ’n Ou-Testamentiese gelowige tussen teëstanders

      10. Want in hulle mond is niks betroubaars nie; hulle binneste bring onheil; hulle keel is ’n oop graf; hulle maak hul tong glad.

      Versugtinge van ’n beleërde Ou-Testamentiese gelowige

      11. Verklaar hulle skuldig, o God! Laat hulle val deur hul planne; dryf hulle weg oor die menigte van hul oortredinge, want hulle is wederstrewig teen U.

      Dawid besef hy is ryk in God en sy blydskap is oor God en in God

      12. Maar laat húlle almal bly wees wat by U skuil; laat hulle vir ewig jubel, en beskut U hulle; en laat in U juig die wat u Naam liefhet.

      13. Want U seën die regverdige, o HERE, U omring hom met welbehae soos met ’n skild.

      Môre-offer van dié wat in Christus is

      En ’n ander engel het gekom en met ’n goue wierookbak by die altaar gaan staan, en baie reukwerk is aan hom gegee, om dit met die gebede van al die heiliges op die goue altaar voor die troon te lê; en die rook van die reukwerk het met die gebede van die heiliges uit die hand van die engel opgegaan voor God (Op 8:3–4).

      1. Vir die koorleiers van die Kerk, met musiekinstrumente wat aan God gewy is

      Nou is ons vrye toegang tot God gegee

Скачать книгу