LITMIR.BIZ

Скачать книгу

      “Kyk hier, hier’s ’n golden opportunity. Vier van hulle. Dis sestig K met een ontvoering. Hulle speel gereeld in ’n park naby hulle huis, wat beteken hulle kan maklike teikens wees. Jy moet met die Opel gaan check of jy die park kry. ’n Mens kan op die foto’s sien dis naby Tygerbergheuwels, en daar’s ook ’n klein shopping centre in die omgewing.”

      Festus staan op. “Oukei. Maar jy moet nog steeds vir my ’n sexy blonde kry.”

      “Ja, ja.”

      Zach hou sy broer dop toe hy uitloop. Siek in sy kop, maar crucial vir die sukses van hulle besigheid. Hyself het nie die guts om in mense se driveway stil te hou en ’n ma en haar kinders binne minute te ontvoer nie.

      Soms dink hy hulle moes ’n minder risky business gekies het. Maar toe hy destyds Tor op sy rekenaar geïnstalleer het om toegang tot die Dark Web te kry om die opsies uit te check, het Festus daarop aangedring dat hulle met Medusa kontak maak. Die blote gedagte om kinders vir vyftienduisend rand per kop te ontvoer, het hom opgewonde gemaak.

      Zach vermoed hy het tóé al die moontlikheid van die ma’s raakgesien.

      * * *

      Boon wag tot dit donker genoeg is voordat hy die koevert in die Tamboerskloof-huis se posbus druk. Hy skarrel terug na sy wegkruipplek oorkant die straat.

      ’n Rukkie gelede het hulle die ligte in die huis aangesit.

      Boon het die outoppie gesien toe hy die gordyne in een vertrek tydsaam toetrek. ’n Forse kêrel met breë skouers, bleskop en grys snor. Die tannie was op die agtergrond sigbaar toe sy krom-krom verbyloop. Sy lyk baie ouer as haar man.

      Boon is net dankbaar dat sy nie bedlêend is weens haar siekte nie. Dit beteken sy is in staat om die huis te verlaat.

      Of hulle gaan val vir die uitnodiging na die simfoniekonsert, sal hy eers môreaand uitvind. Hy kan maar net hoop hulle hou van dié tipe goed.

      Anders sal hy opnuut ’n plan moet beraam om hulle uit die huis te kry. Hy móét daar inkom om sy navorsing te voltooi.

      9

      Kassie kyk aandagtig na die inskrywings op Danie se Facebook-blad.

      Daar’s krieketkommentare van ’n hele paar van Danie se vier-en-tagtig vriende. Die Proteas se vertonings word in tipiese tienertaal geloof of gekritiseer. “Hulle was awesome” of “Hulle suck” kom gereeld voor.

      Hy rol ondertoe op die blad en steek by ’n naam vas: Bertie van Loggerenberg. Dié klein bliksem is ook op Facebook!

      Dis nie ’n wonder hy’t so ongemaklik gelyk toe sy pa sê hy word net toegelaat om na krieketwebwerwe te kyk nie. Hy’t sonder sy ouers se wete vir hom ’n Facebook-profiel geskep en neem lustig deel aan die gesprekke op Danie se muur.

      Kassie neem aan Bertie se pa en ma is nie Facebookers nie, anders sou hulle hom seker uitgevang het. Hy begin vermoed baie ouers wat nie juis rekenaarvaardig is nie, het geen idee van wat hulle kinders in die kuberruim aanvang nie.

      Die inskrywings op Danie se muur strek oor ’n periode van vyftien maande, dus was hy op twaalf al bedrywig op Facebook. Wat heel moontlik beteken daar’s nie ’n manier waarop Facebook se administrateurs kan vasstel of ’n kind oor sy ouderdom lieg wanneer hy ’n profiel skep nie.

      In een inskrywing sê Danie hy spaar vir ’n nuwe kolf, maar “dit kos nou al soveel soos my pa se kar”. ’n Klomp vriende lewer daarop kommentaar, maar niemand praat van kolwe wat hulle vir hom wil wys nie.

      Kassie dink ’n oomblik. Dalk moet hy na Danie se boodskappe kyk. Hy druk op die messages-ikoon en verstar. Hy’t die jackpot gestrike!

      Sy vinger bewe toe hy afrol oor die boodskappe om dit van die oudste na die jongste te lees.

      Die eerste boodskap is drie weke gelede gestuur deur ’n seun met die naam Jakkie Prans. Geoordeel na Jakkie se profielfoto is hy Danie se portuur.

      Jakkie: hi danie. ek ht n klomp splinter nuwe bats. dis baie cheap. R250. sal jy belang stel?

      Danie: Yes, vir sure! Waar bly jy?

      Jakkie: ek sal na jou kom. my pa het n sports winkel en n toy shop en partei keer raak hy van die ou stock ontslae. daar is ok baie toys vir dogterkies. ek sien jy het n sissie. dan kan julle saam kyk waneer ek dit bring.

      Danie: Cool! Ek bly in Durbanville. Wanneer kan jy kom?

      Jakkie: ek sal jou lt weet. doen my net 1 faver. moenie vir jou pals daar van vertel nie. my pa moan as te veel mense daar van weet.

      Danie: OK, laat weet my!!

      Twee weke het verbygegaan voordat Jakkie verlede week Donderdag van hom laat hoor het.

      Jakkie: hi danie. ek kan Saterdag oggend na jou kom. ons het nou baie bats en daars ok baie toys vir dogterkies.

      Danie: Cool! Hoe laat kom jy?

      Jakkie: 10 uur.

      Danie: Kan ek net vir een van my pals vertel? Hy sal ook n bat wil koop.

      Jakkie: hoe oud is hy?

      Danie: 13. Hy is in my klas.

      Jakkie: dis okay dan. sal jou sissie ok toys wil koop?

      Danie: As daar poppe is, sal sy wil.

      Jakkie: ons het baie poppe en dis cheap

      Danie: Ek sal haar vertel.

      Kassie steek nog ’n Lucky met die brandende stompie aan. Hulle hét die bliksem! Van Tonder se buurman het gesê die paneelwa was omtrent tienuur in die straat. Dis duidelik dat die Jakkie-karakter wou seker maak Danie se sussie kom ook na die speelgoed kyk. En hy wou nie hê ’n klomp kinders moet daarvan weet nie. Maar hy was tevrede dat Bertie saamkom, nadat hy eers seker gemaak het dié is nie te oud nie.

      Kassie staar ingedagte na die rekenaarskerm. Die hele storie skree skuldig. Enigiemand wat sy ou voorraad speelgoed en sporttoerusting wil verkoop, sal maar te bly wees om ’n moerse klomp kinders daar te kry – ongeag hulle ouderdomme.

      Jakkie se vreemde van laat ook die rooi ligte flikker. Kassie het nog nooit van ’n Prans gehoor nie. En Jakkie se swak taalgebruik dui op ’n bullshitter wat soos ’n jong kind probeer klink.

      Kassie klik op Jakkie se naam om op sy Facebook-blad te kom. Geen woonadres of persoonlike besonderhede nie. Net twee-en-twintig vriende, van wie die helfte ook vreemde vanne het: Lim, Prinloo (sonder die s), Darry, Klyner …

      Jakkie het geen persoonlike inskrywings gemaak nie, net ’n klomp krieketnuus van verskillende webwerwe af op sy muur gedeel. Wat heel moontlik beteken hy het Danie van die begin af in sy visier gehad. En hy moes op Danie se muur die foto van sy ma gesien het. As jy die merker oor die foto trek, verskyn haar naam by haar gesig, wat aandui dat sy ook ’n Facebook-blad het. En dís waar Jakkie gesien het Nelis van Tonder was laas naweek nie by die huis nie.

      Kassie staan op. ’n Ongekende vuur brand in sy maag. Daarby voel sy lyf so styf soos Jan Koekemoer se kitaarsnare wanneer hy die vastrappolka speel. Kinderhandel. Dis asof sy liggaam teen dié donker gedagte rebelleer.

      Hy loop peinsend heen en weer in die sitkamer. Hoe sou Rooi gevorder het met sy navrae oor ’n Facebook-konneksie by die ander slagoffers? Hy’s lus en bel hom, maar onthou dan Rooi het gesê hy en Torretjie gaan vanaand fliek.

      Een ding besef Kassie: Hulle sal môre by die Valke se Elektroniese Misdaadeenheid moet uitkom. Hyself weet nie genoeg van die internet nie, maar by die eenheid is rekenaarboffins wat skrik vir niks. Daai ouens behoort gou te kan vasstel wat Jakkie Prans se woonadres is.

      Hy vat ’n laaste teug aan sy sigaret. Dis ’n frustrasie dat hy nie dadelik kan werk maak van sy inligting nie.

      Daardie vermiste kinders se foto’s jaag hom.

      * * *

      Hy betrag die geskenke wat hy vanaand vir die kinders gaan neem. Uit gister se gesprek kon hy aflei

Скачать книгу