LITMIR.BIZ

      God se kinders is elke dag wat hulle op aarde deurbring, aan swaarkry onderhewig. Soms raak hierdie lyding só moeilik om te verduur dat ons ten spyte van ons geloof moedeloos en depressief raak. Dit is vir ons bykans onmoontlik om ten tyde van lyding God se vrede in ons lewe te ervaar omdat ons maar net nie kan verstaan wáárom God ons so swaar laat kry as Hy ons liefhet nie. As Hy almagtig is, behoort dit mos vir Hom moontlik te wees om ons lyding weg te neem.

      Christene deur die eeue het al met hierdie vraag geworstel. Tog het die meeste van hulle wat werklik oor die saak nagedink het, besef dat swaarkry uiteindelik tot ons beswil is. Alles hang daarvan af hóé jy na jou persoonlike stuk swaarkry kyk. Wanneer jy dit ’n slag vergelyk met die “heerlikheid wat God vir jou in die toekoms sal laat aanbreek”, sal jy besef dat dit eintlik glad nie so erg is nie en dat dit ook nie vir altyd kan aanhou nie.

      Hou in jou swaarkrytye vas aan Paulus se belofte in 2 Korintiërs 4:17: “Ons swaarkry in hierdie lewe is maar gering en gaan verby, maar dit loop vir ons uit op ’n heerlikheid wat alles verreweg oortref en wat ewig bly.” Die heerlikheid wat vir jou in die hemel wag, is oneindig groter as die swaarkry waarmee jy op die oomblik worstel.

      Vader, U weet dat ek vandag baie moedeloos is – dankie dat ek kan vashou aan u belofte dat my huidige swaarkry sal verbygaan, dat dit maar die voorloper is van die heerlikheid wat vir my by U wag en wat altyd sal bly.

      Amen

      4 Maart

      Drie sugte

      Lees Romeine 8:22-23

      Ons weet dat die hele skepping tot nou toe sug in die pyne van verwagting. En nie net die skepping nie, maar ook ons wat die Gees ontvang het as die eerste gawe van God, ons sug ook – Rom 8:22-23

      Ons lees in Romeine 8 van drie “sugte”: Die skepping sug omdat dit gebroke en verganklik is; gelowiges sug om dieselfde rede en sien uit na dié dag wanneer God se gebroke wêreld weer heel sal word.

      En laastens sug die Heilige Gees sáám met die skepping en die gelowiges omdat Hy ons seerkry en swaarkry intens saam met ons voel.

      Ons weet dat God aan die begin die wêreld goed en mooi gemaak het; ons weet óók dat die hemel vir ons wag. Tog het almal van ons klinkklare redes waarom óns sug: die heersende misdaad; oorloë en natuurrampe; vigs en armoede. Wanneer ons begin lysies maak, wil dit lyk asof ons heelwat meer redes het waarom ons behoort te sug as wat ons het om oor bly te wees!

      Maar as die Heilige Gees werk, werk Hy deur mense. Óns maak die wêreld heel deur die dinge wat ons doen. Die “sug” waarvan Paulus hier praat, is ’n sug wat ons tot aksie moet laat oorgaan sodat ons iets sal dóén aan die gebrokenheid van die wêreld. Daar is ’n pragtige belofte in Romeine 8:23: “Hy sal ons van die verganklikheid bevry.” Ten spyte van ons huidige gesug, kan ons uitsien na die nuwe hemel en nuwe aarde waar God ons van alle verganklikheid sal bevry en ons vir altyd sal lewe.

      Hemelse Vader, soms raak ek moeg van al die dinge in die wêreld wat my laat sug! Dankie vir die belofte dat U my uiteindelik van my verganklikheid sal bevry sodat ek vir altyd saam met U sal leef.

      Amen

      5 Maart

      Die Heilige Gees sug ook

      Lees Romeine 8:26-30

      Die Gees staan ons ook in ons swakhede by: ons weet nie wat en hoe ons behoort te bid nie, maar die Gees self pleit vir ons met versugtinge wat nie met woorde gesê word nie – Rom 8:26

      Die derde sug waarvan Paulus skryf, kom van die Heilige Gees – Hy dra óns sugte na God se genadetroon. Hy pleit vir die gelowiges met “versugtinge wat nie met woorde gesê word nie”; die Heilige Gees vra dat God ons pyn sal raaksien. God hoor wanneer sy kinders sug. Hy luister ook na die versugtinge van die Gees, want die Heilige Gees pleit volgens die wil van God.

      God weet ook van al die verskillende dinge wat jóú laat sug. Hy weet wanneer jy Hom op ’n spesiale manier nodig het. Jy hoef dus nooit depressief of wanhopig te wees nie. God se krag wat in die wêreld werk, is veel groter as wat ons besef. Dit is dieselfde krag wat Hy uitgeoefen het toe Jesus uit die dood opgewek is, skryf Paulus aan die gemeente in Efese (vgl Ef 1:19-20).

      Ons weet al so ’n bietjie van die hemel wat vir ons wag omdat daar teksverse in die Bybel is waar die gordyn so effens weggetrek word, maar die Heilige Gees weet presies hoe dit gaan wees. En ek gee jou die versekering dat dit véél heerliker gaan wees as wat jy dit ooit in jou wildste drome voorgestel het. Om hierdie rede kan jy saam met Habakuk getuig: alhoewel alles op die oomblik so sleg lyk, sal ons nógtans jubel omdat God eendag alles vir ons sal nuut maak (vgl Hab 3:18).

      Heilige Gees, ek loof U dat U by God vir my intree. Dankie vir die belofte dat ek ten spyte van al die dinge wat my laat sug, kan uitsien na ’n ewigheid saam met God.

      Amen

      6 Maart

      Hoop met volharding

      Lees Romeine 8:24-30

      Ons is immers gered, en ons het nou hierdie hoop. Wat ’n mens al sien, hoop jy tog nie meer nie. Wie hoop nog op wat hy reeds sien? Maar as ons hoop op wat ons nie sien nie, wag ons daarop met volharding – Rom 8:24-25

      Soos Jesus se liggaam aan die kruis gebreek is en met sy opstanding weer heel geword het, sal die gebroke skepping ook ééndag met Jesus se wederkoms weer heel wees. Wanneer dit baie swaar gaan, kan jy dus jou swaarkry vergelyk met die hemel wat vir jou wag en dan ervaar dat die swaarkry glad nie teen die heerlikheid opweeg nie. En dit is op hierdie hemel dat ons hoop gerig is.

      “Hoop is die radarstelsel wat op sy eie ’n herlewing kan bespeur. Wanneer ons niks anders kan sien as dit wat ons verloor het nie, dan is hoop die innerlike aanduiding dat iets anders op die horison verskyn. Iets helders, iets nuuts. Iets anders as dit wat ons ooit tevore geken of moontlik verwag het,” sê Robert Crosby by geleentheid.

      God vra van sy kinders om te bly hoop, ook in daardie tye wat hulle nie ’n tree vorentoe kan sien nie. Dat hulle aan sy beloftes sal vashou, al het dit nog nie waar geword nie. Daar is ook ’n verdere belofte om aan vas te hou in Romeine 8:30: “En dié wat Hy geroep het, het Hy ook vrygespreek. En dié wat Hy vrygespreek het, het Hy ook verheerlik.” God wil vir jóú sy radarstelsel van hoop gee sodat jy ten spyte van seerkry en swaarkry seker kan weet dat die hemel naby is.

      Hemelse Vader, baie dankie dat ek weet dat ek kan hoop op die hemel wat vir my wag. Help my om met volharding te bly hoop.

      Amen

      7 Maart

      Waar was God?

      Lees Johannes 11:17-32

Скачать книгу