ТОП просматриваемых книг сайта:
By fonteine langs. Nina Smit
Читать онлайн.Название By fonteine langs
Год выпуска 0
isbn 9780796316714
Автор произведения Nina Smit
Жанр Религия: прочее
Издательство Ingram
Dit is nooit goed om te selfversekerd te wees nie. Jy behoort ook nooit so seker van jou gelukkige huwelik te wees dat jy nie meer gewillig is om daaraan te werk nie. ’n Heel bekende persoon het ’n paar jaar gelede in ’n heel bekende gesinstydskrif met groot bravade oor sy gelukkige huwelik gespog. Nie baie lank daarna nie, was hierdie huwelik op die rotse.
Moet ook nooit jou huweliksmaat óf jou eie gelukkige huwelik as vanselfsprekend aanvaar nie. Moet nooit meen dat jou huwelik onvernietigbaar is of dat jy nooit aan jou huweliksmaat ontrou sal wees (of andersom) nie. Suid-Afrika is ’n land met ’n baie hoë egskeidingsyfer. Jy kan maar net na die heersende statistiek kyk om te besef dat ’n gelukkige huwelik inderdaad ’n gawe uit God se hand is en nie jou eie oulikheid nie.
Dalk gáán daar in jou eie huwelik ook versoekings opduik; wees hulle te wagte. Die positiewe kant is dat, indien jy ’n Christen is, God nie sal toelaat dat jy óf jou huweliksmaat ooit bo julle kragte versoek sal word nie. Hy sal vir julle saam met die versoeking ook die uitkoms gee sodat julle dit sal kan weerstaan, beloof Paulus in 1 Korintiërs 10:13.
Here, ek loof U vir my gelukkige huwelik. Gee dat ek dit altyd as genade uit u hand sal beskou en nooit as ’n vanselfsprekendheid nie. Help ons om in ons huwelik altyd nee te sê wanneer daar versoekings kom.
Amen
21 Februarie
Moenie kwaad word nie!
Lees Jakobus 1:19-27
My liewe broers, dit moet julle in gedagte hou: elke mens moet maar te gewillig wees om te luister, nie te gou praat nie en nie te gou kwaad word nie – Jak 1:19
Ongelukkig is ’n vinnige humeur die oorsaak van baie struwelinge in die huwelik. Dis doodmaklik om vir mekaar kwaad te word en dan dinge te sê of te doen waaroor julle later bitter spyt kan wees. Volg gerus Jakobus se goue raad in vandag se teksvers: Wees gewillig om na jou man te luister, moenie te gou praat nie en moet ook nie te gou kwaad word nie. Om kwaad te word is nie ’n sonde op sigself nie, maar dit sal baie goed wees as jy en jou man saam sal leer om jul woede reg te hanteer. Pleks van met mekaar te baklei, behoort julle bereid te wees om met mekaar te redeneer en jul saak te stel.
Wanneer jy en jou huweliksmaat in ’n onderonsie gewikkel is, besluit vooraf dat julle gewillig sal wees om na mekaar se standpunte te luister. Wanneer jy eers na jou huweliksmaat se kant van die saak geluister het (sónder om hom in die rede te val voordat hy klaar verduidelik het!) is dit baie makliker om jou woede te beheer.
Wanneer jy wel kwaad word, “moenie sondig nie, moenie ’n dag kwaad afsluit nie”, maan die Bybel (vgl Ef 4:26). Wanneer al die geluister nog nie wil help nie, besluit saam dat julle twee nooit kwaad vir mekaar sal gaan slaap nie. Maak vrede voordat julle die kamerlig afskakel!
Here, ek bid dat U my sal leer om my geskille met my man op die regte manier te besleg. Maak ons gewillig om na mekaar te luister en nooit kwaad te gaan slaap nie.
Amen
22 Februarie
Draai die ander wang
Lees Petrus 3:8-12
Moenie kwaad met kwaad vergeld of belediging met belediging nie. Inteendeel, antwoord met ’n seënwens, want daartoe is julle geroep, sodat julle die seën van God kan verkry – 1 Pet 3:9
Ongelukkig is ons nie almal ewe gelukkig wat ons huweliksmaats betref nie. ’n Mens kry wel sommige huweliksmaats wat nie hul kant in die huwelik bring nie. Wat doen jy wanneer jou man vir jou kwaad bly, al is jy van jou kant af volkome bereid om geduldig te wees en nie kwaad te word nie? Wat doen jy wanneer jy ’n man het wat nie rede wil verstaan nie? Petrus sê dat jy (ómdat jy ’n Christen is) bereid behoort te wees om nie kwaad met kwaad te vergeld of ’n belediging met ’n belediging nie.
Wanneer jy ’n onredelike man het, vra dat die Here jou sal help om sy beledigings met seënwense te beantwoord. “As daar van julle is met mans wat nie die woord van God glo nie, en die mans sien hoe godvresend julle is en hoe voorbeeldig julle julle gedra, sal hulle vir Christus gewen kan word deur die gedrag van hulle vrouens. Dit sal nie eens vir julle nodig wees om ’n woord te sê nie,” skryf Petrus (1 Pet 3:1-2). Indien jy dit met God se hulp kan regkry om die minste te wees in jou huwelik, sal jy met jou voorbeeld vir jou man wys dat jy werklik aan God behoort, dat jy self dié dinge doen wat jy van ander mense verwag – en wie weet, dalk gaan jy jou man met jou leefwyse en optrede mettertyd oortuig om soos jy te word!
Here, dis vir my baie swaar dat my man soms so onredelik teenoor my optree. Help my asseblief om hom vir U te wen met die manier waarop ek hom behandel.
Amen
23 Februarie
Wees diplomaties en taktvol
Lees Romeine 12:14-17
Wees bly saam met dié wat bly is en treur saam met dié wat treur – Rom 12:15
Jesus se verhoudingslewe terwyl Hy op aarde was, is gekenmerk deur die feit dat Hy altyd empatie met ander gehad het. Oral waar Hy gegaan het, het Hy mense se probleme raakgesien en hulle probeer help. Hy het siekes gesond gemaak, vir dié wat honger was, kos gegee en dié wat deur ander mense verwerp is, as sy vriende behandel.
Hierdie gesindheid moet jy probeer om in jou eie huwelik in te voer. Om dit reg te kry, sal jy moet leer om diplomaties te wees. Diplomasie beteken dat jy gewillig sal wees om empatie met jou huweliksmaat te betoon en dat jy hom met woord en daad sal verseker dat jy hom liefhet en sy belange op die hart dra. ’n Mens voel nie elke dag dieselfde nie. Soms is jou huweliksmaat depressief as jy vrolik is. Soms gebeur dit ook andersom. Leer om jou in te stem op jou maat se gevoelens en om dié dinge te hoor wat hy nié sê nie. Let op sy liggaamstaal – hoe fyner jy op sy behoeftes ingestel is, hoe beter sal jy hom sónder woorde verstaan.
En bid veral dat jy op dié dae, wanneer albei van julle se bioritmes laag is, die genade sal kry om Spreuke 3:21 se raad te volg: “My seun (dogter!) behou die takt en die oorleg; moet dit nie uit die oog verloor nie, dit sal vir jou ’n mooi lewe verseker en soos ’n pragtige halssnoer vir jou wees.”
Vader, maak dit asseblief vir my moontlik om my man met groot empatie te behandel, om ingestel te wees op sy probleme en om te alle tye taktvol en diplomaties te wees.
Amen
24 Februarie
’n Nuwe vrou!
Lees Kolossense 3:5-14
Julle is die uitverkore volk van God wat Hy baie liefhet. Daarom moet julle meelewend, goedgesind, nederig, sagmoedig en verdraagsaam wees – Kol 3:12
Paulus skryf hier oor die ou en die nuwe lewe van iemand wat tot bekering gekom het. Al die ou, sondige eienskappe wat nog deel uitmaak van ons lewe vóór Christus, behoort ontslae van geraak te word: soos woede, vuil taal, onreinheid, haat en nyd (vgl vers 5). Omdat ons nou met die “ou mens” gebreek het, moet ons in die vervolg soos splinternuwe mense lewe. Ongelukkig sal jy nie sommer soos ’n towerslag van hierdie gewoontesondes waarmee jy so lank saamgelewe het, ontslae kan raak nie. Dit sal ’n daaglikse suiweringsproses van jou vra.
Die nuwe mens behoort soos Jesus te lyk en soos Jesus op te tree. As elke Christenvrou dit kan regkry om in die vervolg meelewend, goedgesind, nederig, sagmoedig en verdraagsaam teenoor haar man op te tree, en boonop geduldig en vergewensgesind is, sal daardie huwelik nie anders kán as om te floreer nie. Die laaste eienskap wat Paulus hier uitlig, is een waarsonder