LITMIR.BIZ

      Madeleine L’Engle vertel dat sy op ’n biblioteekkonferensie deur een van die bibliotekaresses gevra is watter ding sy in die verloop van haar huwelik gedoen het wat die beste was vir haar kinders. “Ek is lief vir my man,” het Madeleine sonder om te dink geantwoord.

      Liefde bedek ’n menigte sondes. Opregte liefde maak ’n huwelikspaar bereid om mekaar se foute oor te sien, nie boek te hou van die kwaad nie, om mekaar weer en weer te vergewe.

      En Jesus vra van jou om jou man so lief te hê soos Hy jou het. Miskien klink dit vir jou onmoontlik – eintlik is dit! Maar God kan jou léér om op hierdie manier lief te hê. En as jy Hom vra, sal sy Heilige Gees dit vir jou moontlik maak.

      Jesus se hele boodskap wat Hy op aarde kom aflewer het, het op die beginsel van onvoorwaardelike liefde berus. Ons skuld mekaar niks nie, net die liefde, skryf Paulus aan die gemeente in Rome. Wanneer ons mekaar liefhet, voer ons die hele wet van God uit (vgl Rom 13:8). Hierdie liefdeskuld behels liefde vir mekaar én liefde vir God.

      Jy kan leer om in Jesus se voetspore te stap, om sy liefdesgebod na die letter in jou eie huwelik uit te leef. Hy sal jou deur sy Heilige Gees help om dit reg te kry sodat jou huwelik ’n bewys sal wees van daardie liefde.

      Here Jesus, U het ons kom leer wat liefde behels. Maak dit vir my moontlik om vir U, elke ander mens, maar veral my huweliksmaat met hierdie onselfsugtige liefde lief te hê.

      Amen

      Gebed

      Here,

      ek bid dat U vir my die wysheid sal gee

      om my man werklik te verstaan;

      om hom lief te hê met passie en entoesiasme,

      om absoluut getrou aan hom te wees,

      en hom daagliks van my bewondering en vertroue te verseker.

      Help my asseblief om die leiersrol in ons huwelik

      aan hom oor te laat

      sodat ons saam na eenheid in ons huwelik kan streef

      en U eerste in ons huwelik sal stel.

      En as daar tye van onvrede kom,

      vra ek dat U vir ons u vrede sal gee,

      dat U ons sal help om ons bekommernisse na U te bring

      en op U te steun in krisistye.

      Gee dat ons ons gelukkige huwelik

      nooit as vanselfsprekend sal beskou nie.

      Dankie dat ons dieselfde sin vir humor het,

      dat ons mekaar kan opbou en versterk

      en bereid is om mekaar onvoorwaardelik te aanvaar.

      Help ons om mekaar aan te spoor tot liefde en goeie dade.

      Maak ons erkentlik en geduldig teenoor mekaar,

      gewillig om na mekaar te luister,

      diplomaties en taktvol in ons omgang met mekaar.

      Leer ons om die tyd tot ons beskikking ten beste te gebruik,

      om net die beste van mekaar te verwag,

      ons foute te erken

      en mekaar onvoorwaardelik lief te hê.

      Amen

      Maart

      Met Jesus op die swaarkrypad

      Elke persoon stap sy eie stuk lydensweg hier op aarde

      soos Jesus daardie laaste twee weke van sy lewe gedoen het.

      Almal van ons ervaar seerkry en swaarkry

      deur die loop van ons lewe

      omdat niémand die lydensweg van swaarkry kan vryspring nie.

      Tog is dit ’n groot troos in swaarkrytye om te weet

      dat Jesus hierdie swaarkrypad reeds vir jou vooruitgeloop het,

      dat Hy presies weet wat lyding en swaarkry behels

      omdat Hy dit self deurgemaak het.

      En omdat Hy, terwyl Hy op aarde was, self gely het,

      het Hy ook simpatie met jóú persoonlike stuk swaarkry –

      beloof Hy, dat Hy ten tye van jou eie swaarkrytye

      ekstra naby jou sal wees

      en vir jou die krag sal gee om dit te kan deurstaan.

      1 Maart

      Lyding ter wille van Jesus

      Lees Matteus 5:10-12

      “Geseënd is dié wat vervolg word omdat hulle doen wat reg is, want aan hulle behoort die koninkryk van die hemel. Geseënd is julle wanneer die mense julle ter wille van My beledig en vervolg […] Wees bly en verheug, want julle loon is groot in die hemel” – Matt 5:10-12

      Op die wêreld kan God se kinders vervolging te wagte wees, voorspel Jesus: “As hulle My vervolg het, sal hulle julle ook vervolg” sê Hy self in Johannes 15:20.

      Dit gebeur baie maal dat Christene óók, soos dit die geval met Jesus was, onregverdige vervolging te beurt val, juis omdat hulle hul geloof uitleef. In die werkplek kan daar teen jou gediskrimineer word, kan jy bevordering verbeur omdat jy ’n Christen is. Hierdie soort swaarkry is goed vir jou, sê Jesus in vandag se teksvers. Wanneer dit jou te beurt val, gaan jou loon in die hemel groot wees.

      “Maar wanneer iemand ly omdat hy ’n Christen is, moet hy hom nie daaroor skaam nie. Inteendeel, as draer van daardie naam moet hy God verheerlik” (1 Pet 4:16). Swaarkry ter wille van jou geloof is nooit ondraaglik nie omdat God self vir jou die genade sal gee om dit te kan verdra.

      In Romeine 8:17 is daar ’n pragtige belofte vir Christene wat swaar kry: “Aangesien ons deel het aan sy lyding, sal ons ook deel hê aan sy heerlikheid.” As dit op die oomblik met jou moeilik gaan, kan jy vir seker weet dat jou swaarkry van die hede nooit sal kan opweeg teen die heerlikheid wat daar vir jou ééndag in die hemel wag nie!

      Here, dankie vir die belofte dat my aardse swaarkry as gevolg van U, eendag vir my sal uitloop op ’n hemelse beloning.

      Amen

      2 Maart

      In hartseertye

      Lees Job 30:20-31

      “Ek roep na U om hulp, maar U antwoord my nie. Hier staan ek, maar U steur U nie aan my nie. Al wat vir my oorbly, is ’n treurlied op die lier, ’n lied van trane op die fluit” – Job 30:20, 31

      Job verwerk sy eie stuk hartseer maar moeilik – in sy hartseertyd ervaar hy dat God Hom nie aan hom steur nie. Niemand hou van hartseer nie. Dit is niks lekker om te treur oor ’n geliefde wat jy verloor het, verhoudings wat skipbreuk gely het of mislukkings in jou eie lewe nie. Tog lui die tweede saligspreking: “Geseënd is dié wat treur, want hulle sal vertroos word” (Matt 5:4). Self het ek al baie maal ervaar dat hartseer my by God uitgebring het.

      Wanneer Christene hartseer is, kan hulle aanspraak maak op God se troos en daardeur ontdek dat hartseer hulle net nader aan God bring.

      “Die Here is naby die gebrokenes, Hy help die moedeloses,” getuig die psalmdigter (Ps 34:19).

      Die Griekse woord vir troos is paraklein – ’n trooster is ’n parakletos, dié naam wat Jesus in Joh 14:16 aan die Heilige Gees gee (vgl 1933-vertaling). God se Heilige Gees in jou lewe sal jou nie net onderskraag

Скачать книгу