LITMIR.BIZ

Скачать книгу

      Dawid se ontmoeting met die reus Goliat bly maar ’n klassieke weergawe van hoe ’n mens ’n grootse uitdaging tegemoet moet gaan. Die storie vertel alles: Die jong seun beland as ’n kosaandraer op die slag­veld. Waarskynlik baie opgewonde. Sy broers is deel van die volksleër. Maar in die Israeliete se kamp loop die spanning hoog. Die moraal is laag. Hulle vrees die ergste. Toe hoor die jong Dawid die dawerende lawaai vanaf die vyandelike linies. ’n Reus van ’n man is besig om die Israeliete te tart en uit te daag.

      Dawid maak nie somme nie. Hy bereken nie getalle en wapentuig en kundigheid nie. Hy is net uiters verontwaardig dat iemand dit durf waag om die Naam van sy God te belaster. Die uitdaging is nou om die groot meneer aan te durf. Maar wie is hy? ’n Jong seun met ’n slingervel? Die soldate neem hom na koning Saul. Die koning moet maar die mannetjie uitsorteer. Hy soek sy dood. Koning Saul bewonder sy moed en bied vir hom ’n harnas en wapens aan. Maar Dawid besluit om in die krag van die Here met ’n slingervel en klippies die stryd aan te pak.

      Die res van die verhaal is oorbekend. Dawid verslaan vir Goliat. Die vyand slaan op die vlug. En die resep vir hantering van ’n uitdaging? Om dit in die Naam van die Here en tot eer van die Here aan te pak.

      Pak jou uitdagings in die Naam van die Here aan, ter wille van die Here.

      15 Januarie

      Dawid op rus

      Toe die routyd oor was, het Dawid haar na sy huis toe laat haal. Sy het sy vrou geword en vir hom ’n seun in die wêreld gebring. Maar wat Dawid gedoen het, was verkeerd in die oë van die Here. 2 Samuel 11:27

      ~

      Koning Dawid het ’n aantal belangrike uitdagings die hoof gebied tydens sy termyn as koning. En hy was meesal suksesvol. Die geheim was dat hy volkome op die Here vertrou het en voortdurend sy raad gesoek het. Maar miskien het die sukses ook in Dawid se geval sy tol geëis. Op ’n keer toe sy leërs teen die noordelike vyand opgetrek het, het die koning by die huis gebly. Dit was heeltemal teen verwagtinge in. Hy was immers die koning wat gewoonlik die voortou in die geveg geneem het. Maar die koning het nie hierdie keer die uitdaging aanvaar om sy leërs aan te voer nie. Dit was lente. ’n Mooi tyd van die jaar om rustig in die paleis deur te bring.

      En toe kom die rustende koning voor ’n ander uitdaging te staan, naamlik om die versoeking te weerstaan. Hierdie keer was dit nie Goliat wat hom uit­gedaag het nie, maar sy eie wellus. En met die toegee aan die versoeking het hy homself in ’n glybaan van sonde bevind. Uiteindelik nie net ’n wellustige koning nie, maar ’n egbreuker en moordenaar.

      Die keerpunt het gekom toe die profeet Natan hom as die skuldige uitge­wys het. “Jy is die man!” En so het die held geval … Maar dit sal onbillik wees om hierdie verhaal as ’n historiese gebeurtenis af te sluit sonder om Psalm 51 te lees. Daar ontdek ons hoe Dawid hom weer tot die Here gekeer het, met be­rou en nuwe toewyding.

      Met die toegee aan versoekings bevind ’n mens jouself op die glybaan van sonde.

      16 Januarie

      Salomo kies reg … en verkeerd

      Here my God, U het my koning gemaak in my vader Dawid se plek, maar ek is nog jonk en onervare en ek moet regeer oor die volk wat deur U uitgekies is, ’n groot volk, te veel om te tel. Gee my die gehoorsaamheid aan U dat ek u volk reg sal regeer en in alles insig sal hê, want wie kan uit homself hierdie groot volk van U regeer! 1 Konings 3:7–9

      ~

      Salomo word koning in sy pa se plek. Watter reus se skoene om vol te staan! Watter geweldige uitdaging. Toe Salomo sommer vroeg in sy amps­termyn by Gibeon gaan offer, het die Here aan hom verskyn en gevra wat hy begeer. Die God aan wie hemel en aarde behoort, gee vir Salomo kans om sy hartsbegeertes te vervul. Wat gaan hy vra? Wat sou jy gevra het? Ons ken teen die tyd reeds die antwoord. Salomo erken dat hy jonk en onervare is en wysheid nodig het om God se volk te regeer. Hy vra nie geld en aansien en oorwinnings nie, maar insig en om God se wil te gehoorsaam. En die gevolge? Hy het een van die roemrykste ryke opgebou deur die regte besluite te neem en die wet van God te gehoorsaam. God het hom ook met rykdom en eer geseën.

      En tog het Salomo se verhaal nie ’n goeie einde gehad nie. Daar was die een opsig waarin hy nie met die nodige insig opgetree het nie. Vroue was sy ondergang. Hy het nie alleen talle heidense vroue in sy harem opgeneem nie, maar selfs hulle afgode begin aanbid.

      Dit is belangrik dat elke gelowige wat aan God gehoorsaam wil lewe sal se­ker maak wat sy of haar Achilleshiel is. Dis juis daar waar jy met die grootste versigtigheid die regte keuses moet uitoefen.

      Een slegte keuse kan ’n goeie lewe verwoes.

      17 Januarie

      ’n Seun wat reg kies

      Toe het die koning op sy plek gaan staan en ’n verbond met die Here gesluit en beloof om die Here te volg en sy gebooie, verordeninge en voorskrifte met sy hele hart en siel te gehoorsaam en om die bepalings van die verbond soos dit in hierdie boek vasgelê is, na te kom. Die hele volk het die verbond aanvaar. 2 Konings 23:3

      ~

      Josia was agt jaar oud toe hy koning geword het. Sy pa, Amon, was ’n slegte koning wat hom glad nie aan die Here se voorskrifte gesteur het nie. Josia het dus uit huis uit nie ’n goeie voorbeeld gekry nie. En tog het iets in die jongman se lewe gebeur wat op ’n godsdienstige reformasie uitgeloop het. Hy was agt jaar aan bewind toe hy die Here begin dien het. In sy agtiende regeringsjaar loods hy ’n projek om die tempel te herstel, wat maar net nog ’n bewys is van die godsdienstige verval in Juda. En dit is toe dat die wet van die Here opnuut ontdek is. ’n Vergete boek. ’n Bykans vergete God. Josia gaan toe dadelik oor tot aksie. Hy betoon berou oor die sondes van sy voorvaders en roep die volk op om die Here te dien. Dit is nie maklik om diepgewortelde afgodspraktyke sommer eensklaps uit te roei nie, maar Josia is vasberade. Hy sluit namens die volk ’n nuwe verbond met die Here. Hierdie jongman het ’n keuse vir die Here gemaak in ’n tyd toe die volk in afgodspraktyke verstrengel geraak het. Die leiding wat hy geneem het, was so sterk en oortuigend dat daar van ’n volksbekering gepraat kan word. Wat het uiteindelik die groot verskil gemaak? ’n Leier wat vir die Here gekies het. En die herontdekking van die Woord van God.

      Leiers wat die Here ken, kan ’n land van ondergang red.

      18 Januarie

      Oorwinning met orkesbegeleiding en koorsang

      Juis toe, toe die sangers met die lofprysing en gebed begin, het die Here onverwagte aanvalle bewerk op die Ammoniete, die Moabiete en die mense van die Seïrberge wat teen Juda opgetrek het, en hulle het die een neerlaag na die ander gely. … Op die vierde dag het hulle ’n samekoms gehou in die Lofdal. 2 Kronieke 20:22, 26a

      ~

      Koning Josafat kry berig dat ’n oormag soldate uit Edom besig is om teen Juda op te ruk. Hy is bang en gaan soek hulp en raad by die Here. Wat moet hy doen? Hoe kan hy die vyand teenstaan? Hy bely dat hulle militêr gesproke geen kans staan om die vyand af te weer nie. ’n Koning en sy volk was selde so totaal afhanklik van die Here. Hulle het dit geweet en bely: “Ons oë is op U gerig” (2 Kron 20:12).

      Toe raak die Gees van die Here vaardig oor ’n profeet. En dié man kom toe met ’n verstommende woord van die Here: Julle moet niks doen nie! Dis nie julle oorlog nie, dis God s’n. Hy sal die vyand verdelg!

      Dit is besluitnemingstyd vir koning Josafat. Is dit regtig ’n boodskap wat van God kom? Wat doen Josafat? Hy en die volk kniel voor die Here en betoon eer aan Hom. Hulle glo die profeet se woorde het van die Here gekom.

      Toe gaan hulle oorlog toe. Vooraan die orkes en die sangers. En hulle sing: “Loof die Here, aan sy liefde is daar geen einde nie.” Intussen het die Here met die oorlog begin. Hy saai verwarring onder die vyandelike magte sodat dié mekaar begin uitmoor! Israel “wen” die oorlog sonder om ’n vinger te verroer. Behalwe om te sing. En toe noem hulle die plek Lofdal, want

Скачать книгу