LITMIR.BIZ

Скачать книгу

lad, think ye?'—'Wha's but the puir man's 'at 's deid?' says I. 'Deil a bit o' 't!' says she, 'an' I beg yer pardon for mentionin' o' him,' says she. An' syne she screwt up her mou', an' cam closs up till me—for I wadna sit doon mysel', an' less wad I bid her, an' was sorry eneuch by this time 'at I had broucht her up the stair—an' says she, layin' her han' upo' my airm wi' a clap, as gien her an' me was to be freen's upo' sic a gran' foondation o' dirt as that!—says she, makin' a laich toot moot o' 't,—'He's Lord Lossie's!' says she, an' maks a face 'at micht hae turnt a cat sick—only by guid luck I had nae feelin's. 'An' nae suner's my leddy deid nor her man follows her!' says she. 'An' what do ye mak o' that?' says she. 'Ay, what do ye mak o' that?' says I till her again. 'Ow! what ken I?' says she, wi' anither ill leuk; an' wi' that she leuch an' turned awa, but turned back again or she wan to the door, an' says she—'Maybe ye didna ken 'at she was broucht to bed hersel' aboot a sax ooks ago?'—'Puir leddy!' said I, thinkin' mair o' her evil report nor o' the pains o' childbirth. 'Ay,' says she, wi' a deevilich kin' o' a lauch, like in spite o' hersel', 'for the bairn's deid, they tell me—as bonny a ladbairn as ye wad see, jist ooncoamon! An' whaur div ye think she had her doon lying? Jist at Lossie Hoose!' Wi' that she was oot at the door wi' a swag o' her tail, an' doon the stair to Jean again. I was jist at ane mair wi' anger at mysel' an' scunner at her, an' in twa min' s to gang efter her an' turn her oot o' the hoose, her an' Jean thegither. I could hear her snicherin' till hersel' as she gaed doon the stair. My verra stamack turned at the poozhonous ted.

      "I canna say what was true or what was fause i' the scandal o' her tale, nor what for she tuik the trouble to cairry 't to me, but it sune cam to be said 'at the yoong laird was but half wittet as weel's humpit, an' 'at his mither cudna bide him. An' certain it was 'at the puir wee chap cud as little bide his mither. Gien she cam near him ohn luikit for, they said, he wad gie a great skriech, and rin as fast as his wee weyver (spider) legs cud wag aneth the wecht o' 's humpie—an' whiles her after him wi' onything she cud lay her han' upo', they said—but I kenna. Ony gait, the widow hersel' grew waur and waur i' the temper, an' I misdoobt me sair was gey hard upo' the puir wee objeck—fell cruel til 'm, they said—till at len'th, as a' body kens, he forhooit (forsook) the hoose a'thegither. An' puttin' this an' that thegither, for I hear a hantle said 'at I say na ower again, it seems to me 'at her first scunner at her puir misformt bairn, wha they say was humpit whan he was born an' maist cost her her life to get lowst o' him—her scunner at 'im 's been growin' an' growin' till it's grown to doonricht hate."

      "It's an awfu' thing 'at ye say, mem, an' I doobt it's ower true. But hoo can a mither hate her ain bairn?" said Malcolm.

      "'Deed it's nae wonner ye sud speir, laddie! for it's weel kent 'at maist mithers, gien there be a shargar or a nat'ral or a crookit ane amo' their bairns, mak mair o' that ane nor o' a' the lave putten thegither—as gien they wad mak it up till 'im, for the fair play o' the warl. But ye see in this case, he's aiblins (perhaps) the child o' sin—for a leear may tell an ill trowth—an' beirs the marks o' 't, ye see; sae to her he's jist her sin rinnin' aboot the warl incarnat; an' that canna be pleesant to luik upo'."

      "But excep' she war ashamed o' 't, she wadna tak it sae muckle to hert to be remin't o' 't."

      "Mony ane's ashamed o' the consequences 'at's no ashamed o' the deed. Mony ane cud du the sin ower again, 'at canna bide the sicht or even the word o' 't. I hae seen a body 't wad steal a thing as sune's luik at it gang daft wi' rage at bein' ca'd a thief. An' maybe she wadna care gien 't warna for the oogliness o' 'im. Sae be he was a bonny sin, I'm thinkin' she wad hide him weel eneuch. But seein' he 's naither i' the image o' her 'at bore 'im nor him 'at got 'im, but beirs on 's back, for ever in her sicht, the sin 'at was the gettin' o' 'in, he's a' hump to her, an' her hert's aye howkin a grave for 'im to lay 'im oot o' sicht intill she bore 'im, an' she wad beery 'im. An' I'm thinkin' she beirs the markis—gien sae it be sae—deid an' gane as he is—a grutch yet, for passin' sic an offspring upo' her, an' syne no merryin' her efter an' a', an' the ro'd clear o' baith 'at stude atween them. It was said 'at the man 'at killt 'im in a twasum fecht (duel), sae mony a year efter, was a freen' o' hers."

      "But wad fowk du sic awfu' ill things, mem—her a merried woman, an' him a merried man?"

      "There's nae sayin', laddie, what a hantle o' men and some women wad du. I hae muckle to be thankfu' for 'at I was sic as no man ever luikit twice at. I wasna weel faured eneuch; though I had bonny hair, an' my mither aye said 'at her Maggy hed guid sense; whatever else she micht or micht not hae. But gien I cud hae gotten a guid man, siclike's is scarce, I cud hae lo'ed him weel eneuch. But that's naither here nor there, an' has naething to du wi' onybody ava. The pint I had to come till was this: the wuman ye saw haudin' a toot moot (tout muet?) wi' that Cat'nach wife, was nane ither, I do believe, than Mistress Stewart, the puir laird's mither. An' I hae as little doobt that whan ye tuik 's pairt, ye broucht to noucht a plot o' the twasum (two together) against him. It bodes guid to naebody whan there's a conjunc o' twa sic wanderin' stars o' blackness as you twa."

      "His ain mither!" exclaimed Malcolm, brooding in horror over the frightful conjecture.

      The door opened, and the mad laird came in. His eyes were staring wide, but their look and that of his troubled visage showed that he was awake only in some frightful dream. "Father o' lichts!" he murmured once and again, but making wild gestures, as if warding off blows. Miss Horn took him gently by the hand. The moment he felt her touch, his face grew calm, and he submitted at once to be led back to bed.

      "Ye may tak yer aith upo' 't, Ma'colm," she said when she returned, "she means naething but ill by that puir cratur; but you and me—we'll ding (defeat) her yet, gien't be his wull. She wants a grip o' 'm for some ill rizzon or ither—to lock him up in a madhoose, maybe, as the villains said, or 'deed, maybe, to mak awa' wi' him a'thegither."

      "But what guid wad that du her?" said Malcolm.

      "It's ill to say, but she wad hae him oot o' her sicht, ony gait."

      "She can hae but little sicht o' him as 'tis," objected Malcolm.

      "Ay! but she aye kens he's whaur she doesna ken, puttin' her to shame, a' aboot the country, wi' that hump o' his. Oot o' fowk's sicht wad be to her oot a' thegither."

      A brief silence followed.

      "Noo," said Malcolm, "we come to the question what the twa limmers could want wi' that door."

      "Dear kens! It bude to be something wrang—that's a' 'at mortal can say; but ye may be sure o' that—I hae hard tell," she went on reflectingly—"o' some room or ither i' the hoose 'at there's a fearsome story aboot, an' 'at 's never opent on no accoont. I hae hard a' aboot it, but I canna min' upo' 't noo, for I paid little attention till 't at the time, an' it's mony a year sin' syne. But it wad be some deevilich ploy o' their ain they wad be efter: it's little the likes o' them wad heed sic auld warld tales."

      "Wad ye hae me tell the markis?" asked Malcolm.

      "Na, I wad no; an' yet ye maun du 't. Ye hae no business to ken o' onything wrang in a body's hoose, an' no tell them—forbye 'at he pat ye in chairge. But it 'll du naething for the laird; for what cares the markis for onything or onybody but himsel'?"

      "He cares for 's dauchter," said Malcolm.

      "Ow ay!—as sic fowk ca' carin'. There's no a bla'guard i' the haill queentry he wadna sell her till, sae be he was o' an auld eneuch faimily, and had rowth o' siller. Haith! noo a days the last 'ill come first, an' a fish cadger wi' siller 'ill be coontit a better bargain nor a lord wantin 't: only he maun hae a heap o' 't, to cower the stink o' the fish."

      "Dinna scorn the fish, mem," said Malcolm: "they're innocent craturs, an' dinna smell waur nor they can help; an' that's mair nor ye can say for ilka lord ye come athort."

      "Ay, or cadger aither," rejoined Miss Horn. "They're aft eneuch jist sic like, the main differ lyin' in what they're defiled wi'; an' 'deed whiles there's no differ there, or maist ony gait, maybe, but i' the set o' the shoothers, an' the wag o' the tongue."

      "An' what 'll we du wi' the laird?" said Malcolm.

      "We maun first see what we can du wi' him. I wad try to keep him mysel', that is, gien he wad bide—but there's that jaud Jean! She's aye gabbin', an' claikin', an' cognostin'

Скачать книгу