LITMIR.BIZ

Скачать книгу

het

      1 Maart Josua 3:9-17

      DIE VOLK TREK DROOGVOETS DEUR DIE JORDAAN

      Toe die voete van die priesters wat die ark dra, in die vlakwater kom, het die water wat afkom, gaan staan (Jos 3:15-16).

      Vir iemand wat die Oranjerivier ken, was dit teleurstellend om die Jordaan, belangrikste rivier in Palestina, te sien: ’n vuilvaal stroompie, skaars 10 m breed. Van kleintydse Boekevat het ek die idee van ’n breë, skoon, vloeiende stroom gehad, die plek waar Israel deurgetrek het, Jesus gedoop is. Dis wel sterk genoeg om die Meer van Gennesaret te voed, maar die pronkbosse van die Jordaan (Jer 12:5 OAV) waar leeus was (Jer 49:19) is nie meer te sien nie. Deesdae is daar brûe waar destyds driwwe was.

      Israel is eindelik gereed om die beloofde land onder Josua binne te trek. Die oomblik het polities aangebreek omdat die Kanaäniete te swak en verdeeld geraak het om weerstand te bied. Dis ’n menigte mense, kinders en vee wat moet oortrek, en God kom hulle in teonome resiprositeit tegemoet. Waarom juis hier? Omdat dit ’n natuurlike toegang was, vlak duskant die vrugbare weiveld, landerye en vrugteboorde van Kanaän, met slegs Jerigo tussenin. In die oestyd was die Jordaan tot aan sy oewers vol (Jos 3:15).

      Hier dam God die water van die Jordaan op sodat dit boontoe “op een hoop gaan staan” (Jos 3:16). Bybelse navorsing toon dat die water in die Jordaan meermale by smal plekke in die rivier opgedam het, spesifiek ná aardbewings. Geboekstaafde gevalle dateer van 1906, 1924 en 1927, toe die rivier deur tonne grond toegeval is sodat die onderloop tot ’n dag lank sonder water was. Volgens Arabiese optekening was daar in die jaar 1267 nC ’n soortgelyke geval. Weer eens word daar nie te kenne gegee dat God nié deur ’n bonatuurlike wonderwerk die Jordaan kon opdam nie. Daar word wel daarop gewys dat God sy wonderwerke ook by wyse van ’n natuurlike verskynsel kan doen (dagstukkie 17 Jan; Num 20:11) … in welke geval die koördinasie van gebeure die eintlike wonderwerk sou wees.

      GEBED: Menigmaal in ons lewe, Here, dam U ook die vloed op om ons behoue anderkant te laat aankom. Hoe U dit doen, is en bly u wonderbare geheime werking.

      2 Maart Josua 6:1-5, 20-22

      DIE MURE VAN JERIGO

      Toe stort die mure inmekaar en die manskappe gaan oor, die stad in (Jos 6:20).

      Argeologiese opgrawings bevestig hierdie gebeure. Hope rousteen is gevind, tot in die huise. ’n Stukkie noordermuur het bly staan, waar Ragab gered sou word (Jos 2:18). Selfs mure (mv) is korrek, want daar was ’n dubbelmuur, die buitemuur die swakste, met ’n gang tussenin.

      Die Joodse toergids na wie ek graag verwys, het gespog: “You may think of the bloody Jews what you like, but they’ve got smart heads.” Hoeveel Godgegewe instink en hoeveel beplande taktiek by Jerigo was, dit het gewerk. ’n Stad was so veilig soos sy mure, en Jerigo, die oudste bekende stad, was onneembaar, totdat Josua tot die aanval oorgegaan het. Ná sewe dae moet die inwoners se senuwees gedaan gewees het. Behalwe die koue rillings wat ’n ramshoring veroorsaak, sou die dreunvoetmars op die Richterskaal kon registreer. Jerigo lê 270 m onder seespieël in ’n skeur van 451 km in die aardkors.

      Toe my broer noem dat infanterie nie oor ’n brug marsjeer nie maar stap, vra ek die ingenieur in die gesin, wat verduidelik: “Alle strukture vibreer (soos jellie) teen ’n natuurlike frekwensie, en as jy dit op die regte tyd ’n stampie gee, bou dit op (superponeer) tot ’n groot golf, byvoorbeeld soos wanneer jy iemand op ’n skoppelmaai swaai. As die gelid teen dieselfde frekwensie (of ’n veelvoud of gedeelte daarvan) marsjeer, kan die amplitude van die natuurlike vibrasie so groot word dat die struktuur breek/uitmekaarval.”

      My kleurskyfie van die Jerigo-uitgrawings wys die aslaag uit Josua se tyd. Maar mens wonder: Het God werklik die vernietiging van alle lewe beveel? (Jos 6:21; dagstukkie 6 Mrt). Dit rym nie met die uitsprake van ander betroubare profete nie (2 Kon 14:6; Eseg 18:20). As die mens se bloed kook, verwar hy maklik “God het gesê” met “Ek wou graag”. Dat die mure egter geval het soos in die Bybel beskryf, staan buite alle twyfel.

      GEBED: Ons sien die goue draad van u Godsbeskikking deur die geskiedenis loop, Here. Dit verwonder ons dat U ons deel van u groot patroon maak.

      3 Maart Josua 10:7-14

      JOSUA SE LANG DAG

      “Son, staan stil in Gibeon, en maan, staan stil in Ajalonlaagte!” (Jos 10:12).

      In ’n bloedige veldslag verslaan Josua hordes van die vyand, en nog meer word deur haelstene neergevel. Die dag sal te kort wees … Josua roep die Here aan, en beveel dan die son tot stilstand. Mens kan sê: Ja, in die Anglo-Boereoorlog by Belmont en Spioenkop het die burgers onder kruisvuur ook geglo die dag sal nooit eindig nie. Of, in die woorde van ’n reisiger: “I spent a year in that town, one Sunday.” Maar dan kan enige wonderwerk weggepraat of gerelativeer word. Die mens doen dit graag met iets wat hy nie verstaan nie.

      Hierdie “vermiste dag” word deur ene Totten genoem saam met die tien grade van die sonnewyser (2 Kon 20:11). Totten se bevindinge (gesteun deur Rimmen en Hill) lui kortliks soos volg: NASA moes, in sy beplanning van ’n bemande maanlanding in 1969, statistiese vooruitberekenings doen. Die posisie van die son, maan en planete asook bekende asteroïede en meteore, moes geverifieer word om ’n botsing te verhoed. Die flikkerpyle op die rekenaarskerm het vorentoe en agtertoe deur die eeue beweeg en toe geblok. Die tegnici kon geen fout vind nie, maar die rekenaar het bly sê daar is een dag te min. Iemand in die span onthou toe vanuit sy Sondagskooldae dié gedeelte uit Josua. Hiervolgens is die rekenaars teruggewerk totdat 23 uur en 20 minute gevind is. Daar was nog 40 minute kort, en die spanlid het verder onthou van die Bybelse sonnewyser. Tien grade is presies 40 minute. Die volle 24 uur was nou opgespoor.

      Soos gewoonlik met so ’n teorie is daar aanhangers en teëhangers. Maar een van laasgenoemde som dit so op: “Al kan die Totten-teorie nie gestaaf word nie, beteken dit nie dat die twee gebeure onwaar is nie. Jy kan die teorie verwerp en steeds onfeilbaar aan die gebeure glo soos dit in die Bybel beskryf word.”

      GEBED: Ons het nie nodig om te soek na bewyse van groot wonderwerke in die geskiedenis nie, Here, omdat ons oorgenoeg bewyse van daaglikse wonderwerke in en om ons het.

      4 Maart Josua 15:13-19

      NOG ’N KIND WAT EIS: “GEE MY!”

      … en sy antwoord: “Gee my ’n stuk vrugbare grond” (Jos 15:19).

      Dalk was hierdie neerskrywer nie lus om “asseblief pa” by te voeg nie bloot om ink en perkament te bespaar. Die verhaal is egter nuuswaardig, omdat ’n dogter vir haar regte opstaan in ’n tyd toe sy nie eens haar man kon kies nie. Dalk moes sy ’n jeugliefde afskryf, of dalk was Otniël ’n onaansienlike bruidegom, sodat Kaleb skuldig voel. Dalk was Aksa sonder broers, en die oudste dogter. Maar selde het ’n vrou so vasbeslote van ’n donkie afgeklim om haar sin te kry. Fonteingrond is van prima waarde, daarvan getuig ons eie fonteinryke plekname. Treffend is die ooreenkoms tussen haar “Gee my”, en dié van die verlore seun in Jesus se gelykenis (Luk 15:12). Sou Aksa haar erfenis darem wyser aangewend het?

      Ouers is deesdae in die knyp met die “Gee my”-eise. “Ek wil dit hê, en ek wil dit nóú hê,” sê die blaasoppie-gesiggies in koopsentrums. Sonder vooraf ooreenstemming en om nie in verleentheid te raak by kopers wat toekyk nie, swig die ouer. Die vervulling van elke impulsiewe behoefte, is dit vryheid? Hoe vry is die meisie met die duurste rok by die matriekafskeid? Die skoolseun wat deurnag mag jol? Die perkelose bedrag sakgeld? Die daaglikse snoepiebesoek? Langenhoven het gesê: “Of dit nou my maag of my kinders is, wat ek die liefste het, bederf ek die meeste; ’n mens verongeluk altyd jou afgod.”

      In ’n land met skerp teenstellings, waar menigeen nie kos het nie, grens praalsug en oordaad aan die vulgêre. Die beste wat jy jou kind kan gee, is ewewigtigheid in keuses, weerstand teen die onnodige, ywer vir die nodige, mededeelsaamheid. Gee dan die fonteingrond … as dit billik is, en as hy of sy dit tot diensbaarheid sal ontwikkel.

      GEBED: Ons almal het die kind in ons wat geneig is om te vra en te eis, Here … meer voorspoed,

Скачать книгу