LITMIR.BIZ

      Баъзан сокин, баъзан шошиб ишлайман,

      Кинли назарлардан қочиб ишлайман.

      Қаламнинг ёвидир диқнафас муҳит,

      Доим кўкка дарча очиб ишлайман.

      Югур.

      Ўкчалаб юр.

      Чуқур нафас ол.

      Дувтаман ёт.

      Ўтир. Чўкка туш. Тўхта.

      Елкасига чиқ. Туш.

      Устидан ўт. Сол.

      Тошни энсангга қўй.

      Нуқта топ, нуқта!

      Қани, тўрт оёқла.

      Юзига ур чанг.

      Эҳтиёт бўғзингга етмасин қўли…

      Бу спортзал.

      Ҳали кўчага чиқсанг,

      Машқларинг

      фойдадан бўлмайди холи.

      Улуғвор бир сарой ичи – кимса йўқ.

      Қаторлар холий.

      «Ҳў-ў!» дедим синаб. Секин.

      Тўрт буржидан минг жавоб қайтди,

      Ўз сасимдан ўдағайлироқ

      Акс садо.

      Шу саройда, сўнгроқ,

      Минг бир одам олдида

      Минг жонзода хитоб этдим, оҳ урдим.

      Овозимни жимжит ютди

      Минг битта ўпка.

      Хотин, шоир Эзоп кўрсами бизни –

      Шоирлар шу кунда кўп бойиб кетди!

      Қара, маошимнинг учдан бир қисми

      Сенга уч дона гул олишга етди!

      «Нега уч?!» деярсан!

      Ахир уч бурчак

      Олам қурувчиси қўлида – паргор.

      Дерлар, энг сабрли халқнинг ҳам

      Бешак

      Уч ёлғондан кейин

      бир наъраси бор.

      Сўзсиз, ҳуснинг рамзи бул биринчи гул,

      Иккинчиси – меҳру вафо шаънингга!!

      Учинчиси эса, мана эллик йил

      Менинг билан чидаб яшаганингга!

      Жаҳон харитасидан

      Боқдим Ўзбекистонга:

      Тоғ, дарёлар устидан

      Оқдим Ўзбекистонга.

      Дейдилар – бахт югурик

      Инсон шу билан тирик.

      Ёзилгандир мангулик

      Бахтим Ўзбекистонга.

      Дунё – эллар бирлиги,

      Шундан унинг сирлиги,

      Айлай умрим борлиғин

      Тақдим Ўзбекистонга.

      Қалбим туяр зўр ҳисни:

      Ҳар гулдаги юлдузни!

      Барча фасллар ҳусни

      Тақдим Ўзбекистонга!

      Дунёга келди одам,

      Нени хуш билди одам?

      Номус-ор эрса фаол,

      Тинмай туғилар савол.

      Инсон ҳам табиат фарзанди асли,

      Жисмида тўрт фасл ҳикмати тахлоқ.